Qatarların hərəkəti bərpa olunub

“Azərbaycan Dəmir Yolları” Qapalı Səhmdar Cəmiyyəti Hacıqabul rayonun Qarasu kəndi ərazisində baş vermiş dəmir yol qəzası ilə bağlı rəsmi məlumat yayıb

“Azərbaycan Dəmir Yolları” QSC-nin Mətbuat Katibliyinin rəisi Nadir Əzməmmədovun Lent.az-a verdiyi məlumata görə, yanvarın 3-də saat 22.50-də Bakı-Böyük Kəsik istiqamətinin Qarasu-Padar mənzilinin 390-cı km-də yük qatarının 7 vaqonu relsdən çıxıb.

Nəticədə hər iki istiqamətdə qatarların hərəkəti dayandırılıb. Hadisənin nəticələrinin aradan qaldırılmasına “Fövqəladə Hallar Yatarı” MMC-nin Hacıqabul, Yevlax bölmələrinin canlı qüvvəsi və texnikası cəlb edilib. Saat 7:15-də qatarların hərəkəti, bir yollu olmaqla, bərpa edilib. Baş vermiş hadisə nəticəsində hər iki istiqamətdə sərnişin və yük qatarlarının hərəkətində gecikmələr qeydə alınır. Hadisənin baş vermə səbəbi müvafiq qurumlar tərəfindən araşdırılır.