“Təzə Bazar”da yanğın söndürüldü - YENİLƏNİB-1

Bakıda "Təzə bazar"da baş verən yanğın söndürülüb.

Bu barədə APA-nın hadisə yerində olan müxbiri xəbər verib.

Hadisə bazarın geyim əşyaları və meyvə-tərəvəz satılan hissəsindən başlayıb. Alov tez bir zamanda geniş ərazini əhatə edib. Hadisə yerinə Bakının müxtəlif rayonlarından yanğınsöndürmə briqadaları cəlb olunub.

Alovla təxminən 40-45 dəqiqəlik mübarizədən sonra yanğın söndürülüb və bütün bazarı əhatə etməsinin qarşısı alınıb. İlkin məlumata görə, sahibkarlara yanğın nəticəsində xeyli ziyan dəyib.

***

Fövqəladə Hallar Nazirliyi (FHN) “Təzə Bazar”-da baş vermiş yanğınla bağlı məlumat yayıb

APA-nın FHN-nin saytına istinadən verdiyi xəbərə görə, nazirliyin Böhran Vəziyyətlərində İdarəetmə Mərkəzinə Bakı şəhəri, Nəsimi rayonunda “Təzə Bazar” adlanan ərazidə yanğın baş verməsi haqqında məlumat daxil olub.

Dərhal Dövlət Yanğından Mühafizə Xidmətinin qüvvələri hadisə yerinə cəlb olunub. Hazırda yanğın məhdudlaşdırılıb. Yanğının söndürülməsi istiqamətində işlər davam etdirilir.

***

Bakıda "Təzə bazar"da yanğın hadisəsi baş verib.

APA-nın məlumatına görə, hadisə yerinə çoxlu sayda yanğınsöndürən maşınları cəlb edilib.

Yanğının söndürülməsi istiqamətində tədbirlər görülür.

Zərərçəkənlər barədə hələ ki, məlumat yoxdur.