“Zika” ilə bağlı fövqəladə vəziyyət bitdi

Ümumdünya Səhiyyə Təşkilatı (ÜST) qlobal miqyasda “Zika” virusunun yayılması ilə bağlı fövqəladə vəziyyətin bitdiyini elan edib.

APA-nın xəbərinə görə, bu barədə ÜST-ün yaydığı məlumatda bildirilir.

“Zika virusu və onun yaratdığı fəsadlar əhəmiyyətli və uzunmüddətli problem olaraq qalmaqdadır, lakin onlar beynəlxalq səviyyədə ictimai səhiyyə sistemi üçün təhlükə kəsb etmirlər”, məlumatda qeyd edilir.

Xüsusilə, hamilə qadınlar üçün təhlükəli olan “Zika” virusu mikrosefaliya xəstəliyinin yaranmasına (başın digər orqanlara nisbətən kiçilməsi) səbəb olur. Bu xəstəlik körpə uşaqlarda başın və beynin inkişafını əngəlləyərək ağır fiziki və əqli qüsurlar yaradır. Virusa yoluxma əsasən milçək və ağcaqanadlar vasitəsilə baş verir.