FHN yataqxanadakı partlayışla bağlı məlumat yayıb

Lent.az-ın nazirliyin saytına istinadən verdiyi məlumata görə, hadisə ilə bağlı məlumat daxil olandan sonra dərhal müvafiq qüvvələri zəruri tədbirlərin görülməsi üçün hadisə yerinə cəlb edilib, aidiyyəti qurumlar məlumatlandırılıb.

Hadisə yerində əməliyyat şəraiti qiymətləndirilərkən məlum olub ki, binanın 2-ci mərtəbəsində 1950-ci il təvəllüdlü Cəfərov Rəhman Qulam oğluna məxsus mənzilin yanar konstruksiyaları 60 kvadrat metr sahədə yanıb. Hadisə zamanı binada olan vətəndaşlardan 9-u müxtəlif xəsarət alıb.

Zərərçəkənlər xəstəxanaya aparılıb. Hadisə yerinə cəlb olunmuş yanğınsöndürənlər 10 nəfəri, o cümlədən 4 azyaşlı uşağı yanğından xilas edib, daha 32 nəfərin təxliyəsini həyata keçirilib.

Yataqxana binasını yanğından mühafizə etmək mümkün olub. Həmçinin, əraziyə cəlb olunmuş xilasedicilər müvafiq təhlükəsizlik tədbirlərinin görülməsini təmin etmiş və hüquq mühafizə orqanlarının və digər aidiyyəti qurumların əməkdaşları ilə birgə bina sakinlərinin təhlükəsiz məsafəyə uzaqlaşdırılmasını həyata keçirilib.

Yanğın saat 18:40-da yanğınsöndürənlər tərəfindən söndürülüb. Yanğın yerinin kəşfiyyatı zamanı 1950-ci il təvəllüdlü Cəfərov Rəhman Qulam oğlunun cəsədi aşkarlanıb.

Hadisə ilə əlaqədar müvafiq qurumlar tərəfindən araşdırma aparılır.