MTN TQDK-nın dərsliklərini saxtalaşdıran şəxsi həbs edib

Onun mənzillərindən 130 mindən artıq çap və poliqrafiya məhsulu aşkarlanıb

Milli Təhlükəsizlik Nazirliyi tərəfindən həyata keçirilən tədbirlər nəticəsində Azərbaycan Respublikası Tələbə Qəbulu üzrə Dövlət Komissiyasının abituriyentlərə, yuxarı sinif şagirdlərinə və müəllimlərə kömək məqsədilə nəşr etdirdiyi dərsliklərin nümunələrinin qeyri-qanuni çap edilməsi ilə məşğul olan Bakı şəhər sakini, 1959-cu il təvəllüdlü Vəliyev Əfqan Vəli oğlu saxlanılıb.

Bu barədə Lent.az-a MTN ictimai əlaqələr mərkəzindən bildirilib. 2009-cu il iyul ayının 2-də Əfqan Vəliyevə məxsus Bakı şəhərinin Badamdar qəsəbəsindəki və 1-ci Alatavadakı evlərdə, həmçinin həyətyanı tikililərdə keçirilən baxış zamanı qanunsuz çap edilmiş 130 mindən artıq müxtəlif adda çap və poliqrafiya məhsulu, o cümlədən Tələbə Qəbulu üzrə Dövlət Komissiyasının abreviaturası altında dərc edilmiş, guya bu qurumun çap məhsulu hesab olunan jurnal və kitabçalar, test tapşırıqları, test bankları, abituriyentlərə kömək, eləcə də çap prosesində istifadə olunan 4 min 620 ədəd ofset plastin, 4 min 200 ədəd nəşriyyat plyonkası, kitab formasında cildlənməmiş 9 min ədəd hazır vərəq, 2 min ədəd test blanklarının üzlükləri və 1050 adda ədəbiyyat, habelə müxtəlif təyinatlı çap dəzgahları aşkarlanıb.

Faktla bağlı toplanılmış materiallar müvafiq araşdırmalar aparılması üçün aidiyyəti üzrə Respublika Baş Prokurorluğuna göndərilib.

« 03 » iyul 2009-cu il