Van-Təbriz, Van-Urmiya aviareys açılıb

Türkiyənin “Borajet” aviaşirkəti bu gündən etibarən Van-Təbriz və Van-Urmiya aviareysləri həyata keçirəcək. APA-nın Türkiyə mediasına istinadən verdiyi məlumata görə, bu gün uçuşların başlaması ilə bağlı Van şəhərində tədbir keçirilib. Tədbirdə Van vilayətinin valisi Münir Karaloğlu, Urmiya bələdiyyəsinin rəhbəri Məhəmməd Həzrətpur Talatapeh və iki vilayətin yüksək rütbəli şəxslər iştirak ediblər.

M.Karaloğlu öz çıxışında bildirib ki, “Borajet”-in bu uçuşlar iki ölkə arasında əlaqələrin daha da möhkəmlənməsinə yardımçı olacaq. Onun sözlərinə görə, bu həmçinin turizm, təhsil, mədəniyyət, idman sahələrində əlaqələrin inkişafına da öz töhfəsini verəcək: “Bizim üçün Urmiya, Xoy, Bakı, Təbriz kimi şəhərlər çox vacibdir. Biz ayrı-seçkilik etmirik. Əsas odur ki bizim vətəndaşlar istədiyi yerə rahat gedib-gələ bilsin. Bu yaxınlarda biz Vandan Ərbilə və Süleymaniyyəyə də uçuşları da həyata keçirəcəyik”.

Qeyd edək ki Van-Təbriz aviareysi həftədə 3, Van-Urmiya reysi isə həftədə 2 dəfə gerçəkləşəcək.