Bin Ladenin cəsədini dənizin dibində axtaracaq - FOTO

Lent.az-ın Türkiyə mediasına istinadən verdiyi məlumata görə, dəniz dibinin araşdırılması üzrə peşəkar dalğıc olan Bil Varren Bin Ladenin ölümü ilə bağlı şübhələrə son qoymaq üçün bu qərara gəlib.

Bu işi hər şeydən öncə şəxsi marağı naminə edəcəyini deyən Bill Varren cəsədi tapmaq üçün okeanın dibinə enəcək. Əgər dalğıc uğur əldə etsə, o Bin Ladenin suyun dibindəki cəsədinin fotolarını çəkəcək və saç-saqqalından kəsərək quruya çıxaracaq.

İndiyədək 200-dən çox dərinliyi fəth etmiş Varren okeanın dibinə Pakistan sahillərindən enəcək. Amerikalı dalğıca cəsədin atıldığı yerin dəqiq nişan veriləcəyi təqdirdə onun işi daha asan olacaq.

Amerikalı dalğıcın şübhələrə son qoymaq arzusu isə ona 400 min dollara başa gələcək. Suyun dibinə enərkən o özü ilə son texnologiyaların məhsulu olan cihazlar və digər vəsaitlər də götürəcək.

Qeyd edək ki, dünyanın bir nömrəli terroristi hesab olunana Üsəma Bin Laden ABŞ xüsusi xidmət orqanları tərəfindən may ayında Pakistan ərazisidə öldürülüb. Rəsmi məlumata görə, Bin Ladenin meyiti daha sonra okeana atılıb.