Avropa Liviya qərarını verəcək

Lent.az-ın “Associated Press” agentliyinə istinadən verdiyi məlumata görə, əsas müzakirə mövzusu Liviyadakı situasiyadır. Avropa Birliyinin növbədənkənar sessiyasında Müəmmər Qəddafi rejiminə qarşı yeni sanksiyalar paketinin qəbul olunacağı gözlənilir. Söhbət ilk öncə Müəmmər Qəddafi və ailə üzvlərinin hesablarının dondurulmasından, Liviya Mərkəzi Bankı ilə hesablaşmaların dayandırılmasından gedir. Avropa Birliyinin dövlət və hökumət başçıları Liviya müxalifəti ilə bağlı da vahid mövqe formalaşdırmağa çalışacaqlar.

Paralel olaraq, Brüsseldə NATO-ya üzv dövlətlərin müdafiə nazirlərinin toplantısı keçiriləcək. Liviya səmasında uçuşların qadağan edilməsi və bununla da Müəmmər Qəddafinin qiyamçılara qarşı hərbi aviasiyadan istifadə etməsinin qarşısının alınması əsas müzakirə mövzusudur.

Bu arada Fransa prezidenti Nikola Sarkozinin Liviya prezidenti Müəmmər Qəddafinin nəzarətində olan ərazilərə hərbi zərbə endirilməsi təklifi ilə çıxış etməyə hazırlaşdığı barədə məlumat yayılıb. O, bu təklifini Avropa Birliyinin növbədənkənar sessiyasında səsləndirəcək. Nikola Sarkozi Sirt və Sebha şəhərlərindəki hərbi aerodromların bombalanmasını zəruri sayır.