Türkiyədə jurnalistlər mitinq keçirib

Türkiyədə bir qrup media mənsubu ölkədə jurnalistlərə qarşı repressiya dalğası ilə əlaqədar etiraz aksiyası keçirib. APA-nın “Habertürk”ə istinadən verdiyi məlumata görə, İstanbulun Taksim meydanına toplaşan media təmsilçiləri və omlara dəstək verən ictimaiyyət nümayəndələri martın 3-də terror təşkilatı olduğu iddia edilən “Ergenekon”la bağlı istintaq çərçivəsində 9 jurnalistin polis tərəfindən həbs edilməsinə etirazlarını bildiriblər.

Türkiyə Jurnalistlər Sindikatı və “Jurnalistlərə Azadlıq” Platforması tərəfindən təşkil olunan aksiya yürüşlə davam edib. Müxalifətdəki Cümhuriyyət Xalq Partiyasının (CHP) İstanbul millət vəkili Mehmet Sevigən də azad mətbuata dəstək məqsədilə yürüş-mitinqə qatılıb.

Qeyd edək ki, Türkiyədə apardığı jurnalist araşdırmaları ilə tanınan “Milliyet” qəzeti və “Star” televiziyasının əməkdaşı Nedim Şənər də daxil olmaqla 9 jurnalist martın 3-də “Terror təşkilatı “Ergenekon”a üzvlük” ittihamı ilə həbs olunub. Bununla da Türkiyədə həbsdə olan media mənsublarının sayı 62-yə çatıb. Onların hamısı Türkiyədəki mövcud hökumətə qarşı müxalif mövqedədir.