Bəhreyndə yenə qan töküldü

Lent.az-ın “mignews.com” saytına istinadən verdiyi məlumata görə, bu gün təhlükəsizlik qüvvələrinin açdığı atəş nəticəsində 2 aksiya iştirakçısı da həyatını itirib. Beləliklə, dünəndən başlayaraq aksiyalarda həyatlarını itirən şiələrin sayı 4 nəfərə çatıb. Müxalifətdə olan şiələrin İslam Assosiasiyası Partiyası baş verənlərə etiraz əlaməti olaraq deputatlarını parlamentdən geri çağırıb. 40 deputatı olan Bəhreyn parlamentində İslam Assosiasiyası Partiyasının 18 deputatı var.

Bəhreyn Daxili İşlər Nazirliyi bildirib ki, bu gün dünən polislə toqquşma zamanı ölən aksiya iştirakçılarının birinin dəfəni ilə bağlı keçirilən mərasim zamanı qarşıdurma baş verib. Bu zaman təhlükəsizlik qüvvələri atəş açıb və 2 nəfər həyatını itirib.

Hazırda paytaxt Manama ətrafındakı kəndlərdə, xüsusən Manamanın qərbində və şimalında yerləşən yaşayış qəsəbələrində şiələrin kütləvi aksiyaları keçirilir. Artıq aksiyaların Manamanın tarixi mərkəzi olan Balad əl-Kadim məhəlləsində də başladığı barədə xəbərlər daxil olub.

Xatırladaq ki, fevralın 14-də Bəhreyndə sünnilərlə bərabər şiələrin də seçki hüquqlarının əksini tapdığı yeni Konstitusiyanın qəbul edilməsi, baş nazirin seçki yolu ilə müəyyənləşməsi, siyasi məhbusların azad edilməsi və işgəncələrə son qoyulması tələbi ilə keçirilən kütləvi aksiyalarda ölənlər olub. 2 nəfər həyatını itirib, 25 nəfər yaralanıb.
Qeyd edək ki, Bəhreyndə əhalinin əksəriyyətini şiələr təşkil edir, hakim kral ailə isə sünnidir. Aksiyaların təşkilatçıları sosial şəbəkələrdən istifadə edir və Bəhreyn əhalisini hakimiyyətdən çəkinməyərək dinc aksiyalar çıxmağa çağırırlar.