Məşhur heykəli oğurladılar - FOTO

Belçikanın Qeraardsberqen şəhərinlə mərkəzi meydanda olan qədim “Manekken Pis” (“İşəyən uşaq”) fontanı oğurlanıb.

Lent.az-ın “RİA Novosti” agentliyinə istinadən verdiyi məlumata görə, miniatür-heykəl formasındakı məşhur fontanı oğurlayanlar isə artıq bəyanat veriblər.

“Manekken Pis Azadlıq Cəbhəsi” adından yayılan bəyanatda bildirilib ki, bu, həmin miniatür-heykəlin Brüssel hakimiyyəti tərəfindən 1600-cü ildə hazırlanaraq bu şəhərə hədiyyə edilməsi barədə hazırlanan telereportaja etiraz olaraq bu addımı atıblar. Onlar yerli əhalinin buna etiraz etməməsindən əsəbiləşiblər. Çünki tarixi salnamələrdə “Manekken Pis”in hələ 1499-cu ildə şəhərdə olduğu yazılıb. Bu isə “Manekken Pis”in Brüsselin simvolu olan oxşar miniatür fontandan 160 il “yaşlı” olduğunu göstərir.

“Manekken Pis” oğurlayanlar yaxın vaxtlarda açıqlayacaqları şərtlər yerinə yetirildikdən sonra onu qaytaracaqlarını bildiriblər. Şəhər bələdiyyəsi bu oğruların pis niyyətli olmadığı qənaətindədir. Polis isə “Manekken Pis”i bu səhər iki gənc oğlanın oğurladığı barədə şahidlərdən məlumat alıb.