Mübarəkə toxunmurlar

Misiri idarə edən Ali Hərbi Şura ABŞ, Böyük Britaniya və Fransaya müraciət edib. Lent.az-ın “Reuters” agentliyinə istinadən verdiyi məlumata görə, hərbi rəhbərlik sabiq prezident Hüsnü Mübarək administrasiyasının keçmiş məmurlarının bu ölkələrdə olan hesablarının dondurulmasını xahiş edib.

Siyahıda Hüsnü Mübarək və onun ailə üzvlərinin adları yoxdur. Böyük Britaniyanın xarici işlər naziri Uilyam Xeyq dünən belə bir müraciət aldıqlarını təsdiqləyib. Misir hakimiyyəti analoji müraciəti Avropa Birliyinə də ünvanlayıb. Avropa Birliyi ölkələrinin xarici işlər nazirlərinin məsələni bu gün keçiriləcək xüsusi iclasda müzakirə etmələri gözlənilir.

Xatırladaq ki, İsveçrə Hüsnü Mübarək prezident postundan istefa verəndən dərhal sonra onun və ailə üzvlərinin hesablarını dondurduğunu açıqlayıb. Böyük Britaniya da Misirin yeni rəhbərliyi müraciət edərsə, belə bir addım atmağa hazır olduğunu bəyan edib.