“Doğan Holdinq”in yayım hüququ əlindən alına bilər

Hərraclarda şirkətin səhmlərinin alqı-satqısına rəsmi qadağa qoyuldu

“Doğan Holdinq”in üzərindən qara buludlar əskilmək bilmir. Lent.az-ın “internethaber”ə istinadən verdiyi məlumata görə, Radio və Televiziya Üst Qurumundan (RTÜK) gələn xəbərdarlığın ardınca hərraclarda holdinqin səhmlərinin alqı-satqısına rəsmi qadağa qoyulub.

“Doğan Holdinq”in almanlara satdığı hissələrin 25%-lik həddi keçərək ,Teleradio yayımı haqqında qanunvericiliyə zidd hərəkət etdiyi iddia olunub. İddiaya görə, holdinq 28 şirkətinin 34%-ini almanlara satıb. Bu gün o iddialarla bağlı “Doğan Holdinq” açıqlama verib.

Holdinqin birjaya göndərdiyi açıqlamada deyilir: “Bu gün bəzi mətbu orqanlarda Radio və Televiziya Üst Qurumunun qrupumuzda fəaliyyət göstərən nəşr qurumlarımızla bağlı bir qərar verdiyi yazılıb. Bildiririk ki, bununla əlaqədar nəşr qurumlarımıza hansısa rəsmi məlumat verilməyib. Mövzuyla bağlı bir yenilik olacağı təqdirdə cəmiyyətə məlumat veriləcək”.

“Doğan Qrup”dan verilən bu açıqlamanın ardınca birjalarda holdinqin səhmlərinin alqı-satqısına qoyulan qadağa götürülüb.

Lakin “Doğan Qrup”un üstündəki qara buludlar bununla bitmir. Belə ki, maliyyə məsələlərini düzəltmək üçün holdinqə 3 ay vaxt verilib. Əgər bu müddətdə pozuntular düzəlməzsə, hodinqə yayım üçün verilən lisenziya geri alınacaq.