“Ayrılıq” İsraillə Türkiyənin arasına girdi

İki ölkənin münasibətləri getdikcə pisləşir
Dünən gecə TRT 1-də ilk seriyası yayımlanan, “Fələstin torpaqlarında yaşananlar...” sözləriylə reklam edilən “Ayrılıq” adlı teleseriala İsraildən sərt reaksiya gəlib.

Lent.az-ın Türkiyənin NTV telekanalına istinadən verdiyi məlumata görə, İsrail xarici işlər naziri Avigdor Lieberman Türkiyə səfirinin səlahiyyətlərini icra edən şəxsin İsrail Xarici İşlər Nazirliyinə çağırılması ilə bağlı təlimat verib.

Axşam saatlarında “Yedioth Ahranot” qəzeti də internet saytında böyük bir yazı yerləşdirib və israillilərin serialın yayımlanmasıyla ciddi travma aldıqları vurğulanıb. Xarici işlər naziri Avigdor Lieberman qəzetə açıqlamasında deyib ki, bu, ciddi təxribatdır və dövlət dəstəyilə həyata keçirilib. Xarici işlər naziri belə bir serialın Türkiyəyə yayımlanmasının çox üzücü bir hadisə olduğunu dilə gətirib.

İsrailin “Kanal 2” televiziyası serialın Türkiyədə İsrail və yəhudi düşmənçiliyi formalaşdırmağa yönələn təxribat yönümlü bir layihə olduğunu qeyd edib. “Kanal 2” də xarici işlər nazirinin Türkiyə səfirinin səlahiyyətlərini icra edən şəxsin Xarici İşlər Nazirliyinə çağırılması və ona nota təqdim edilməsi barədə təlimat verdiyi barədə xəbər yayıb.

“Kanal 2” Türkiyədə “TRT1” kimi bir telekanalda belə serialların yalnız hökumətin istəyi və göstərişiylə yayımlana biləcəyini vurğulayıb.

Qeyd edək ki, teleserialda israilli hərbçilərin fələstinli uşaqlara və dinc insanlara qəsdən atəş açdıqları göstərilir.