Məsud Yılmazın ailəsi dağılır, siyasəti buraxır

Türkiyənin sabiq baş naziri Məsud Yılmazın qanı qaradır.

Lent.az-ın Türkiyənin “Vatan” qəzetinə istinadən verdiyi məlumata görə, Məsud Yılmaz və Berna Yılmaz cütlüyü hələ bu ilin yay aylarında boşanmağa qərar verib. Ancaq Berna Yılmazın Bodrumda ayağı qırıldığı üçün cütlük boşanmağı təxirə salıb və münasibətlərinə bir müddət “istirahət” qərarı verib.

Qeyd edək ki, 1976-cı il avqustun 15-də evlənən və 2 oğul övladları olan cütlüyü boşanma qərarından vaz keçirmək üçün ailə dostları hərəkətə keçiblər. Onların arasında Hüsamettin Özkan kimi gənclik dostları da var.

Qeyd edək ki, keçən həftə Ankarada Türkiyənin 7-ci prezidenti Süleyman Dəmirəlin evində Demokrat Partiyasının sədri Hüsamettin Cindoruk ilə partiyanın sabiq sədrlərindən olan Məsud Yılmaz bir araya gəliblər. Bu görüşdə Mesut Yılmaz Süleyman Dəmirələ deyib ki, artıq ümidi qalmayıb, siyasəti buraxır. O, siyasətdə əzəli rəqibi olan Tansu Çillerin də yenidən Demokrat Partiyasının sədrliyi postuna gətirilməsi təklifinə də etiraz etməyib.