Tam elektriklə işləyən Ford Mustang Mach-E modeli əsasında hazırlanan sürücüsüz taksilər artıq bu yay Londonda fəaliyyətə başlayacaq.
Lent.az xarici mediaya istinadən xəbər verir ki, Uber şirkəti şəhər nəqliyyatını süni intellekt vasitəsilə dəyişdirmək məqsədilə Britaniyanın Wayve startapı ilə əməkdaşlığa başlayıb.
Uber yaxın vaxtlarda London küçələrində xidmət göstərəcək yeni robotaksi parkını təqdim edib. Avtomobillər Wayve şirkəti ilə birgə hazırlanıb və tam elektriklə işləyən Ford Mustang Mach-E platforması üzərində qurulub.
Nəqliyyat vasitələri 360 dərəcə müşahidə imkanı verən kameralar və radarlarla təchiz olunub. Bu sistemlər sayəsində Wayve-in süni intellekti avtomobilin ətrafındakı vəziyyəti real vaxt rejimində tam şəkildə analiz edə bilir.
İlkin mərhələdə avtomobildə təhlükəsizlik məqsədilə sertifikatlı operator sükan arxasında əyləşəcək. Uber bildirir ki, gələcəkdə insan müdaxiləsi olmadan tam avtonom idarəetmə rejiminə keçilməsi planlaşdırılır.
Sərnişinlər üçün hansı yeniliklər olacaq?
Uber bildirir ki, UberX, Uber Electric və ya Uber Comfort kateqoriyası üzrə avtomobil sifariş edən istifadəçilər əlavə ödəniş etmədən təsadüfi şəkildə robotaksi ilə səfər edə bilərlər.
Əgər sərnişin sürücüsüz avtomobillə getmək istəməzsə və sükan arxasında insan olan nəqliyyat vasitəsinə üstünlük verərsə, bu seçimdən imtina etmək imkanı olacaq.
Avtomobillərin salonunda interaktiv ekranlar quraşdırılacaq. Sərnişinlər həmin ekran vasitəsilə səfəri başladacaq, marşrutu izləyəcək və lazım gəldikdə 64 dildə fəaliyyət göstərəcək dəstək xidməti ilə əlaqə saxlaya biləcəklər.
Uber hələlik dəqiq tarix açıqlamasa da, xidmətin bu yay istifadəyə veriləcəyi gözlənilir.
Şirkət ilk istifadəçilərdən olmaq istəyən London sakinləri üçün xüsusi Interest List (Maraqlanan istifadəçilər siyahısı) yaradıb. Bunun üçün Uber tətbiqini yenilədikdən sonra Account → Settings → Ride Preferences → Autonomous Vehicles → Join Interest List bölməsinə daxil olmaq lazımdır.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
