Bir çox istifadəçi evdə Wi-Fi siqnalının zəif olmasının səbəbini internet provayderində və ya routerin gücündə axtarır, halbuki problem çox vaxt cihazın sadə quruluş detalında gizlənir. Mütəxəssislər bildirirlər ki, antenanın düzgün yerləşdirilməsi siqnalın keyfiyyətinə birbaşa təsir edir.
Lent.az xarici mediaya istinadla xəbər verir ki, əksər insanlar router antenalarını avtomatik olaraq şaquli vəziyyətdə saxlayır və bunu universal həll hesab edir. Lakin bu yanaşma yalnız müəyyən hallarda effektivdir. Bir mərtəbəli mənzildə şaquli antenalar siqnalın üfüqi istiqamətdə yayılmasına kömək edir və eyni səviyyədə sabit internet təmin edir.
Amma çoxmərtəbəli evlərdə vəziyyət fərqli olur. Eyni istiqamətdə yerləşdirilən antenalar siqnalın yuxarı və aşağı mərtəbələrə çatmasını çətinləşdirir. Bu halda mütəxəssislər ən azı bir antenanın bucağını dəyişməyi tövsiyə edir. Optimal variant kimi antenanı təxminən 45 dərəcə əymək və ya üfüqi vəziyyətə gətirmək göstərilir. Bu üsul siqnalın daha geniş sahəyə yayılmasına və digər mərtəbələrə çatmasına kömək edir.
Ekspertlər qeyd edir ki, bu sahədə universal qayda yoxdur və ən yaxşı nəticə təcrübə yolu ilə əldə olunur. İstifadəçilərə əvvəlcə mövcud vəziyyətdə internet sürətini yoxlamaq, sonra isə antenaların mövqeyini dəyişərək fərqi müşahidə etmək tövsiyə olunur.
Bununla yanaşı, Wi-Fi keyfiyyətinə təsir edən digər amillər də var. Routerin evin mərkəzinə yaxın yerləşdirilməsi siqnalın bərabər paylanmasına kömək edir. Eyni zamanda cihazı iri məişət texnikasının və metal əşyaların yaxınlığında yerləşdirməkdən çəkinmək lazımdır, çünki bu cür maneələr siqnalı zəiflədə bilər.
Mütəxəssislər əlavə edir ki, mümkün olduqda 5 GHz tezliyindən istifadə etmək daha yaxşı nəticə verir, çünki bu tezlik 2.4 GHz ilə müqayisədə daha sürətli və stabil bağlantı təmin edir.
Nəticə etibarilə, Wi-Fi sürətini artırmaq üçün bahalı avadanlıq almağa ehtiyac olmaya bilər – bəzən sadəcə antenanın düzgün bucaq altında yerləşdirilməsi kifayət edir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
