(R) “Atena- Aqat Aqro” heyvandarlıq kompleksinin açılış mərasimi keçirildi

“Atena” MMC növbəti böyük layihəsini uğurla həyata keçirdi. Belə ki, Ağcabədi rayonunda yerləşən “Atena – Aqat Aqro” heyvandarlıq kompleksinin avqust ayının 29-da keçirilmiş açılış mərasimində Azərbaycan Respublikasının Prezidenti İlham Əliyev cənabları iştirak edib.

Öz yeni kompleksi ilə “Atena” MMC Azərbaycanın uğurlu inkişafına yardım edərək heyvandarlıq, süd və eləcə də süd məhsullarının istehsalı ilə bölgənin rifahına müsbət təsir göstərməyi nəzərdə tutub. Yeni ferma özündə təxminən 38 hektar ərazini birləşdirərək, 9500 baş heyvanın sağlam şəraitdə saxlanılmasına imkan verir.

Süd məhsullarının təbii ferma südündən istehsal olunması, ölkəmizdə istehlakçılar üçün çox mühüm əhəmiyyət kəsb edir. Yeni kompleks “Atena”nın istehsal etdiyi qablaşdırılmış süd, ayran, qatıq, xama, pendir, kərə yağı kimi məhsulların daha da yüksək keyfiyyətlə bazara çıxarılmasına şərait yaradacaq. Fermada Almaniyadan gətirilmiş və ideal şəraitdə saxlanılan 3000 baş məhsuldar inəkdən yüksək keyfiyyətdə süd istehsal edilir və süd məhsullarının istehsalında “100 % Öz Fermamızın Südü”ndən prinsipinə əsaslanır. İnəklər həm qapalı, həm də açıq tövlələrdə böyük qayğı ilə bəslənir, yalnız təbii yemlə yemlənir və əldəymədən sağılır. Bundan əlavə, fermada sağmal inək, dana və buzovlar üçün xüsusi tövlələr nəzərdə tutulub. İnəklərin sağımı eyni anda 40 inəyi sağmağa imkan verən “Rotary” sistemə malik son texnologiyalı 2 ədəd sağım otağında tamamilə avtomatik sistemlə, əl dəymədən həyata keçirilir. Fermanın avtomatik sistemində tətbiq olunan şok soyutma üsulu ilə sağılmış südün istiliyi ani olaraq 38°C-dən 4°C temperatura qədər salınır. Bu texnologiya dünyanın ən müasir texnologiyasıdır.

Yaxın illərdə “Atena – Aqat Aqro”-nun ikinci kompleksinin tikilib istismara verilməsi nəzərdə tutulur ki, bu da əhalinin bütünlüklə təbii ferma südü ilə təmin olunmasına böyük imkanlar yaratmış olacaq.