“APA Holding” ilə GRBS arasında saziş imzalandı

Bu gün Bakıda «APA Holding» ilə GRBS Şirkətlər Qrupu arasında əməkdaşlıq sazişi imzalanıb.

APA-nın məlumatına görə, «APA Holding»in ofisində keçirilən tədbirdə müqaviləni «APAHolding»in prezidenti Vüsalə Mahirqızı və GRBS Şirkətlər Qrupunun baş direktoru Bəhram Qurbanov imzalayıblar.

Tədbirdə çıxış edən Vüsalə Mahirqızı bildirib ki, müqavilə çərçivəsində GRBS Şirkətlər Qrupu tərəfindən «APA Holding»in əməkdaşları üçün müxtəlif xidmətlər, o cümlədən xarici dillər, mühasibatlıq, kargüzarlıq, texniki peşələr üzrə kurslar təşkil olunacaq.

«GRBS-in gələcəkdə peşə təhsili ilə bağlı bəzi layihələri var. Holdinqimizə daxil olan APA TV bu layihələrdə iştirak edə, laboratoriya rolunu oynaya bilər», - deyə V.Mahirqızı bildirib.

Şirkət rəhbəri gələcəkdə «APA Holding» əməkdaşlarının GRBS-in təşkil etdiyi kurslarda uğurla iştirak edəcəyini vurğulayıb: «Mən həmişə istəmişəm ki, əməkdaşlarımız xaricdə və ölkə daxilində keçirilən kurslarda, seminarlarda iştirak etsinlər, peşəkarlıqlarını artırsınlar. Ümid edirəm ki, bu əməkdaşlığımız uğurla inkişaf edəcək».

GRBS Şirkətlər Qrupunun rəhbəri B.Qurbanov isə qeyd edib ki, rəhbərlik etdiyi təşkilat akkreditasiyalarının sayına görə öz sahəsi üzrə dünyada ilk beşlikdə dayanır. Postsovet məkanında isə GRBS ilk yeri tutur: «Hər bir təşkilatın gücü onun kadrlarındadır. Biz GRBS olaraq yüksək səviyyəli təhsil xidmətləri təşkil edirik. Hazırda Özbəkistan, Ukrayna, Belarus, Moldova və s. kimi ölkələrdən Bakıya gəlib bizim şirkətin təhsil kurslarında iştirak edirlər».

B.Qurbanov onu da əlavə edib ki, GRBS tərəfindən Bakı Beynəlxalq Peşə Məktəbi adlı ilk özəl peşə təhsil müəssisəsi yaradılıb. Yaxın vaxtlarda Təhsil Nazirliyindən lisenziya alandan sonra məktəb fəaliyyətə başlayacaq.