TQDK sədri banklardan şikayətləndi

Lent.az-ın verdiyi məlumata görə, Məleykə Abbaszadə deyib ki, əvvəllər TQDK-nın keçirdiyi imtahanlarda nəzarətçi qismində iştirak edən müəllimlərə ayrılan pullar imtahandan sonra nağd şəkildə onlara çatdırılıb.

Ancaq sonradan bu pulların müəllimlərin plastik kartlarına köçürülməsi ilə tələbə uyğun olaraq həmin pullar müəllimlərin kartlarına köçürülməyə başlanılıb: “İndi də imtahan bitəndən sonra 3 gün ərzində pullar müəllimlərin kartlarına köçürülməlidir. TQDK ilə bağlı bu məsələdə problem yoxdur. Sadəcə, banklarla bağlı problem var. Mərkəzdəki banklar bu işi yaxşı görür və 3 gün ərzində pulu müəllimlərin kartlarına köçürür, gecikmə olmur. Ancaq bankların filiallarında pul köçürmələri ilə bağlı problem yaranır və pulun köçürülməsi günlərlə gecikir. Banklar TQDK-ya 3 gün ərzində pulun müəllimlərin hesablarına köçürüləcəyinə zəmanət verib. Ancaq problem yaranır və bu da bankların işini təkmil qura bilməməsi ilə əlaqədardır”.