4 ildə 290 uşaq ailələrə verilib

Nazirliyin mətbuat xidmətinin rəhbəri Anar Qədirli Lent.az-a bildirib ki, idarənin mərkəzləşmiş qeydiyyat komissiyası edilən müraciətləri araşdırır: “Əsasən yerli ailələrə üstünlük verilir. Təqdim olunan sənədlər yoxlanılmaqla yanaşı, ailələrin durumu araşdırılır, əlaqədar orqanların rəyi nəzərə alınır, ümumiyyətlə isə bütün prosedur qaydalarına əməl edilir. Bundan sonra məhkəmə qaydasında uşaqlar ailələrə övladlığa verilir. Belə ki, məhkəmənin qərarı olmadan övladlığa vermə mümkün deyil”.

A.Qədirli deyib ki, I və II qrup əlillərin övladlığa uşaq götürmək istəyi qəbul olunmur. Bu isə bəzən narazılıqla qarşılanır: “Nazirlər Kabinetinin 15 avqust 2000-ci il tarixli 141 saylı qərarıyla I və II qrup əlillərə, ruhi xəstələrə, dəri-zöhrəvi, infeksion xəstəliklərinə yoluxanlara, narkoman və spirtli içkilərə aludə olanlara övladlığa uşaq verilmir. Belə şəxslərin müraciətləri geri qaytarılır”.

Qeyd edək ki, ötən il Türkiyədə əlil və psixoloji durumu normal olmayan 4 ailə tərəfindən övladlığa götürülmüş uşağa qarşı həyata keçirilən fiziki zorakılıqla bağlı cinayət işi açılıb.