Qanunsuz ov edən 8 nəfər saxlanılıb

Ekologiya və Təbii Sərvətlər Nazirliyinin aidiyyəti qurumlarının əməkdaşları tərəfindən 19-21 fevral tarixlərində ölkə ərazisində “Ovçuluq haqqında” qanununun tələblərinə əməl olunması vəziyyətinin araşdırılması məqsədilə növbəti reydlər keçirilib. Ekologiya və Təbii Sərvətlər Nazirliyinin mətbuat xidmətindən Lent.az-a verilən məlumata görə, Oğuz rayonu ərazisində keçirilən reyd zamanı qanunsuz ov edən 1 nəfər saxlanılıb və ondan 1 ədəd ov tüfəngi götürülüb.

Qanun pozucusunun şəxsiyyətinin müəyyənləşdirilməsi məqsədilə Oğuz rayon Polis Şöbəsinə müraciət edilib. Zaqatala Dövlət Təbiət Qoruğunun ərazisində keçirilən reyd zamanı da mühafizə rejimini pozan 2 şəxs saxlanılıb, onlardan 2 ədəd ov tüfəngi, 4 ədəd patron aşkar edilərək götürülüb və həmin şəxslər barəsində müvafiq akt və protokollar tərtib olunub.

Ağzıbir, Sarısu, Mahmudçala və Samux Ovçuluq Təsərrüfatlarında keçirilən reydlər zamanı mühafizə rejimini pozan 5 nəfər saxlanılıb və onlardan, ümumilikdə 5 ədəd ov tüfəngi və 5 ədəd patron aşkar edilərək götürülüb. Fakt üzrə qanuna müvafiq qaydada akt və protokollar tərtib edilib.