Londonda Azərbaycanı tanıtım tədbiri keçirib

Böyük Britaniyanın məşhur “Royal Holloway” universitetinin “Azərbaycan” Cəmiyyəti Londonda Azərbaycanın tanıtımı ilə bağlı tədbir keçirib.

Cəmiyyətdən Lent.az-a verilən məlumata görə, mərasimə Azərbaycanın İngiltərədəki səfiri Fəxrəddin Qurbanov da qatılıb. Tədbiri giriş nitqi ilə açan cəmiyyətin sədri Cəbrayıl İsmayılov Azərbaycanla bağlı həqiqətlərin dünya ictimaiyyətinə çatdırılması üçün bütün dünyada diaspora təşkilatlarımızın, cəmiyyətlərin fəal olmasının vacibliyini vurğulayıb. O, tədbirin keçirilməsinin də məhz bu məqsədə xidmət etdiyini deyib. Onun sözlərinə görə, Azərbaycanın tarixi ilə bağlı yanlış məlumatların yayılmasının qarşısını almaq üçün ölkəmizin yürütdüyü siyasət, mədəniyyətimiz, tariximiz təbliğ olunmalıdır.

“Royal Holloway” universitetinin tələbəsi Babək Məmmədzadə isə erməni işğalı nəticəsində 1 milyondan çox qaçqın və məcburi köçkünün öz doğma yurd-yuvasından didərgin düşdüyünü diqqətə çatdırıb. Torpaqlarımızın erməni işğalçılarından azad edilməsi yönündə hələ ki, danışıqlar aparıldığını söyləyən Babək Məmmədzadə ölkə prezidentinin dediyi kimi danışıqlar səmərə verməzsə, hərb yolunun qaçılmaz olduğunu vurğulayıb: “Azərbaycan qoşulduğu beynəlxalq konvensiyaların hər bir tələbinə əməl etsə də, Ermənistan bu tələblərin heç birinə məhəl qoymayaraq imza atdığı sənədlərin tələblərini pozmaqda davam edir”.

Daha sonra universitetin doktoranturasında təhsil alan azərbaycanlı tələbə Vüsal Musayev söz alaraq ölkəmizin iqtisadiyyatının dinamik inkişafından danışıb. Azərbaycan iqtisadiyyatının gücləndiyini bildirən həmyerlimiz ölkəmizdə sahibkarlığın inkişafına göstərilən diqqət nəticəsində yeni iş yerlərinin açıldığını söyləyib.

Cəmiyyətin nümayəndəsi İsmayıl Məlikov isə Azərbaycanın qədim mədəni irsindən söz açıb. Azərbaycan mədəniyyətinin dünyanın hər bir yerində təbliğinin vacib olduğunu söyləyən İsmayıl Məlikov hər bir azərbaycanlının mənfur düşmənlərimizə mədəni sərvətlərimizə sahib çıxmağa əngəl törətməli olduğunu bildirib.

Tədbirdə Araz Quliyev də Azərbaycanda biznes mühiti, turizmin imkanlarından danışıb. Mərasimə universitet tələbələri ilə yanaşı elm adamları, xarici tələbələr də qatılıblar. Tədbirin rəsmi hissəsi başa çatdıqdan sonra, Azərbaycanın qədim musiqi incisi sayılan ozan sənəti nümayiş olunub.