Əli Abbasov: “Nazirliyin müəssisələrində dezinfeksiya aparılması gündəmdə deyil”

“Əgər Səhiyyə Nazirliyinin müvafiq tədbirləri olarsa, biz də ona qoşulacağıq”

“Azərbaycanda cəmi bircə nəfər A/H1N1 virusuna yoluxmaqda şübhəli bilinib. Ölkədə bu problem hələ ki, yoxdur. Ona görə də Rabitə və İnformasiya Texnologiyalarının (RİTN) xidmət müəssisələrində müvafiq tədbirlərin keçirilməsi gündəmdə deyil”.

Bunu Lent.az-ın əməkdaşının “RİTN-in xidmət müəssisələrində A/H1N1 virusu əleyhinə dezinfeksiya işləri aparılacaqmı?” sualına cavab olaraq, rabitə və informasiya texnologiyaları naziri Əli Abbasov deyib. “Əgər Səhiyyə Nazirliyinin müvafiq tədbirləri olarsa, biz də ona qoşulacağıq” – deyə, nazir bildirib.

“Donuz qripi” kimi tanınan A/H1N1 virusu Azərbaycanda ilk dəfə bu ilin yayında iki nəfərdə qeydə alınıb. Sonradan həmin şəxslər sağalıb. Səhiyyə Nazirliyi bu il noyabrın 4-də daha bir nəfərdə bu virusun aşkarlandığını bəyan edib. Noyabrın 5-də isə daha iki nəfərdə A/H1N1 virusu aşkarlanıb. Hazırda ölkədə bu virusa yoluxanların sayı 3 nəfərdir.

Pərvin ABBASOV