Gənc həkimlərin 80 faizi bölgələrə göndərilir

2010-cu ildə Azərbaycan Tibb Universitetinin məzunlarının 80 faizə qədəri bölgələrdəki xəstəxanalara təyinat alıb. Lent.az-ın məlumatına görə, bunu Səhiyyə Nazirliyində keçirilən kollegiya iclasındakı çıxışında Tibbi yardımın təşkili şöbəsinin müdiri Soltan Əliyev söyləyib. O, bildirib ki, başa çatmaqda olan 2010-cu il ərzində tibbi təhsil və kadr islahatı sahəsində müstəsna əhəmiyyətli tədbirlər həyata keçirilib.

Şöbə müdiri deyib ki, ATU-nun məzunlarının bilavasitə vakant yerlərə təyinatla göndərilməsi işi davam etdirilir. Nazirlik xüsusən də kənd yerlərində kadrların çatışmazlığını nəzərə alaraq gənc həkimlərin çoxunun bölgələrdə işləməsinə çalışır.

“Bir neçə ildir ki, problemin həlli yollarından biri olan, bütün dünyada qəbul edilən, tibb işçilərinin sertifikasiyanın tətbiqi üzrə gərgin iş aparılır. Artıq bu istiqamətdə hazırlıq işləri başa çatdırılmış və gələn ilin əvvəlindən sertifikasiya prosesi başlanacaq. Həmçinin tibbi təhsilin müasir səviyyədə təşkili prinsiplərinə uyğun olaraq gələn ildən rezidentura sisteminə keçid də planlaşdırılır” - deyə, Soltan Əliyev bildirib.

Elxan SALAHOV