Mövsümi xəstəliklər ev quşları arasında ölüm hallarını artırıb

Kənd Təsərrüfatı Nazirliyi yanında Dövlət Baytarlıq Xidmətinin (DBX) mətbuat xidmətinin rəhbəri Yolçu Xanvəli Lent.az-a açıqlamasında belə deyib. Onun sözlərinə görə, son vaxtlar istər ev, istərsə də çöl quşları arasında payız fəslinə xas olan xəstəliklər müşahidə olunur. Fərdi təsərrüfatlarda saxlanılan ev quşları arasında qurd xəstəlikləri daha çox qeyd alınır.

Yolçu Xanvəli deyir ki, baytarlıq xidməti orqanları mövsümi xəstəliklərin yayılma ehtimalını nəzərə alaraq yerlərdə profilaktik tədbirlər aparır. Belə ki, fərdi təsərrüfatlardakı ev quşları müayinə edilir, təsərrüfat sahiblərinə müvafiq tövsiyələr verir Onun sözlərinə görə, Samux, Şabran, Lənkəran, Ağcabədi, Salyanda və digər bölgələrdə çöl və ev quşlarından götürülmüş qan nümunələrində zəhərlənmə halları və qurd xəstəlikləri tez-tez aşkarlanır. Bu isə müxtəlif səbəblərdən, o cümlədən ev quşlarının saxlanma şəraitindən və onlara verilən yemdən ola bilər.

DBX rəsmisi fərdi təsərrüfatlarda saxlanılan ev quşları arasında kütləvi tələfatın olması barədə məlumatlara da münasibət bildirib. Yolçu Xanvəli deyib ki, təsərrüfat sahibləri belə hallarla rastlaşarlarsa, onlar özləri baytarlıq xidməti orqanlarına xəbər verməlidir: “Hansı təsərrüfatda ev quşları arasında ölüm halları varsa, baytar çağırsınlar. Amma lazım olan dava-dərmanı təsərrüfat sahibləri özləri almalıdır. Çünki biz yalnız “Taun”a qarşı ildə bir dəfə peyvəndləmə aparırıq” .

Yolçu Xanvəli onu da deyib ki, ev quşlarını mövsümi xəstəliklərdən qorumaq üçün təsərrüfat sahibləri baytarların tövsiyəsi ilə peyvəndləmə aparmalı, toyuq-cücənin saxlandığı yerləri təmiz saxlamalıdırlar.

Elxan SALAHOV