Qiymətlər 0,7 faiz bahalaşıb

2010-cu ilin avqust ayında istehlak mallarının qiymətləri və xidmət tarifləri iyul ayı ilə müqayisədə 0,7 faiz bahalaşıb.

Dövlət Statistika Komitəsindən Lent.az-a bildiriblər ki, ötən ay ərzində ərzaq məhsullarının qiymətləri 1,0 faiz, qeyri-ərzaq malları və əhaliyə göstərilən pullu xidmətlərin qiymət və tarifləri 0,2 faiz artıb. Avqustda ərzaq məhsullarından buğda ununun, çörək məhsullarının, makaron məmulatlarının, mal ətinin, qatığın, brınza pendirinin, yumurtanın, kərə yağının, bitki yağlarının, limonun, bananın, şabalıdın, kələmin, xiyarın, pomidorun, çuğundurun, kökün, kartofun qiymətləri bahalaşıb.

Bundan başqa, ötən ay ərzində bəzi ərzaq məhsullarının qiymətlərində ucuzlaşma da müşahidə olunub. Məsələn, əlavə toyuq məhsullarının, təzə balığın, pasterizə olunmamış üzlü südün, xamanın, almanın, armudun, qarpız və yemişin, üzümün, badımcanın, soğanın qiymətləri ucuzlaşıb. Ay ərzində qeyri-ərzaq mallarından geyim və ayaqqabı qrupları üzrə ucuzlaşma, inşaat malları üzrə isə bahalaşma qeydə alınıb.

Avqust ayında əhaliyə göstərilən pullu xidmətlərdən MDB ölkələrinə hava və dəmiryol sərnişindaşıma nəqliyyatı üzrə bahalaşma olub.

Elxan SALAHOV