Qurmaqda olan Urmiya gölünün indi də rəngi dəyişir

Urmiya gölü ilə bağlı yaranmış problem aradan qalxmayıb. Güney Azərbaycanın Qərbi Azərbaycan əyalətinin Urmiya şəhəri kənarında yerləşən bu göl yeni böhranlı vəziyyətlə üzləşib.
Lent.az-ın «canaz.tv»-yə istinadən məlumatında bildirilib ki, gölün suyu ənənəvi rəngini dəyişərək, başqa rəng alır.

Mənbə bildirir ki, bir həftə öncədən başlayan rəng dəyişməsi prosesinin səbəbi hələ də müəyyənləşməyib. Mütəxəssislər bu hadisə ilə bağlı iki mülahizə irəli sürüb:
1) çirkab və kanalizasiya sularının gölə axıdılması;
2) gölün suyu azaldığından onun tərkibində duzun miqdarının artması.

Xatırladaq ki, İran hökumətinin iclaslarından birində Mahmud Əhmədinijatın başçılığı altında Urmiya gölünün problemlərinin araşdırılması ilə bağlı dövlət komissiyası yaradıldığı elan olunsa da ötən 5 ay müddət ərzində gölün qurumasının qarşısının alınması ilə bağlı heç bir iş görülməyib. Prezidentin müavini və komissiyanın sədri Məhəmmədrza Rəhimi isə bildirmişdi ki, bu su hövzəsi ətrafında çoxsaylı problemlər yaranıb və onları həll etmək lazımdır: «Komissiya tarixi gölün problemləri ilə məşğul olacaq və onun quruması səbəblərini araşdıracaq. Gölü xilas etmək üçün əlimizdən gələni edəcəyik».

Mütəxəssislər isə bildirib ki, qısa bir zamanda Urimya gölündə yaranmış problemlər aradan qaldırılmazsa, bu su hövzəsi xəritədən silinəcək.

Qısa arayış: Bu su hövzəsi həcminə görə İranda ən böyük göl hesab olunur. Onun sahəsi təqribən 5000-6000 kv.km, suyun həcmi 20-24 milyard kub metr idi. Gölün eni 40 km, uzunluğu 130 km-dir. Dəniz səviyyəsindən 1274 m yüksəklikdə yerləşir. Qədim türk dilində bu gölün adının mənası “suda yaşayış yeri” anlamını verir.
1967-ci ildə Urmiya gölü qoruq elan olunub. Bundan başqa, YUNESKO bu gölü qorunan təbii ərazilər sırasına daxil edib. Amma təəssüf ki, bu su hövzəsi Tehran hakimiyyəti kimi, BMT-nin uyğun qurumunun yadından çıxıb, yaxud göllə bağlı verdikləri bəyanatları unudublar…

Sədrəddin Soltan