İmtahan mövsümü başa çatır

Avqustun 29-da əsas təhsil bazasından kolleclərə keçiriləcək imtahanlarla builki mövsümə yekun vurulacaq

Ümumi orta təhsil bazasında (9 illik) orta ixtisas təhsili müəssisələrinə sənəd qəbulu artıq başa çatıb. Qəbul imtahanı isə avqustun 29-da Bakı, Sumqayıt, Naxçıvan, Gəncə, Lənkəran, Mingəçevir, Şəki, Şirvan, Ağcabədi, Göyçay və Quba şəhərlərində keçiriləcək.

Lent.az-ın məlumatına görə, Tələbə Qəbulu üzrə Dövlət Komissiyasının (TQDK) sədri Məleykə Abbaszadə bu gün keçirdiyi mətbuat konfransında belə deyib. O, bildirib ki, xüsusi qabiliyyət tələb edən ixtisasları seçən abituriyentlər yaradıcılıq qabiliyyətinin yoxlanılması məqsədilə seçmə turda iştirak ediblər. Seçmə turlar ilk dəfə olaraq TQDK-nın təşkil etdiyi Yaradıcılıq Qabiliyyətinin Yoxlanılması Komissiyaları tərəfindən mərkəzləşdirilmiş qaydada keçirilib.

Komissiya sədri deyib ki, əsas (9 illik) təhsil bazasından orta ixtisas təhsili müəssisələrinə qəbul imtahanında iştirak etmək üçün 30660 abituriyent ərizə təqdim edib. Onun sözlərinə görə, bununla 2010-2011-ci tədris ili üzrə ali və orta ixtisas məktəblərinə qəbul mövsümü başa çatacaq.

Elxan SALAHOV