Kolleclərə ixtisas seçimi bu gün başa çatır

Artıq 21 min 780 abituriyent ali məktəblərin boş qalan yerlərinə və tam orta təhsil bazasından kolleclərə ixtisas seçimi ərizəsini təsdiqləyib

2010/2011-ci tədris ili üçün ali təhsil müəssisələrinin boş qalan yerlərinə və tam orta təhsil bazasından orta ixtisas təhsili müəssisələrinə ixtisas seçimi mərhələsi bu gün başa çatır.

Tələbə Qəbulu üzrə Dövlət Komissiyasının mətbuat xidmətinin rəhbəri Elnur Nağızadə Lent.az-a bildirib ki, həmin abituriyentlər gecə saat 00.00-dək ixtisas seçimi ərizəsini təsdiqləməlidirlər. Onun sözlərinə görə, bu gün saat 12.30-a olan məlumata əsasən, ali təhsil müəssisələrinin boş qalan yerlərinə və tam orta təhsil bazasından orta ixtisas təhsili müəssisələrinə ixtisas seçimində iştirak etmək hüququ olan abituriyentlərin 21 min 780 nəfəri ixtisas seçimi ərizəsini təsdiqləyib.

Elnur Nağızadə deyib ki, bu gün həm də əsas (9 illik) orta təhsil bazasından kolleclərə ixtisas seçimi də yekunlaşır. Onun sözlərinə görə, həmin abituriyentlər saat 17.00-dək seçdikləri ixtisasların kodlarını elektron ərizələrinə daxil edib təsdiqləməlidirlər. Artıq 30 mindən çox abituriyent ixtisas seçimi ərizəsini təsdiqləyib.

Elxan SALAHOV