Magistraturaya əlavə qəbulun nəticələri

Əlavə yerləşdirmədə 256 nəfər var

Ali təhsil müəssisələrinin magistraturalarının boş qalan plan yerlərinə müsabiqənin nəticələri açıqlanıb. Müsabiqənin nəticələri avqustun bu gün saat 16:00-da Tələbə Qəbulu üzrə Dövlət Komissiyasının (TQDK) internet saytında yerləşdirilib.

TQDK-nın mətbuat xidmətindən Lent.az-a bildiriblər ki, qəbul olan bakalavrların siyahısı “Magistr” jurnalının 7-ci sayında dərc olunacaq. Müsabiqə nəticəsində 256 magistratura səviyyəsi üzrə təhsil almaq hüququ qazanıb. Ali təhsil müəssisələrinin magistraturalarının boş qalan plan yerlərinə qəbul olanlar 2010-cu il avqustun 11-dən 20-dək sənədlərini qəbul olduqları təhsil müəssisəsinə təqdim edərək qeydiyyatdan keçməlidirlər. Həmin müddətdə qeydiyyatdan keçməmək bakalavrın müvafiq ixtisasa yerləşdirilməsindən imtina etməsi kimi qiymətləndiriləcək və onun qəbul haqqında əmri ali təhsil müəssisəsinə göndərilməyəcək.

Xatırladaq ki, Azərbaycan Respublikası ali təhsil müəssisələrinin magistraturalarının boş qalan plan yerlərinə ərizələrin qəbulu internet vasitəsilə 2010-cu il iyulun 29-dan avqustun 5-dək aparılmışdı.

Elxan SALAHOV