Texnikumlara qəbul başladı
06 avqust 2010 20:00 (UTC +04:00)

Texnikumlara qəbul başladı

Artıq 563 abituriyent əsas təhsil bazasından texnikumlara qəbulda iştirak etmək üçün ərizəsini təsdiqləyib

Əsas (9 illik) təhsil bazasından orta ixtisas məktəblərinə indiyədək 27 312 nəfər sənəd verib.

Lent.az-ın məlumatına görə, Tələbə Qəbulu üzrə Dövlət Komissiyasının (TQDK) sədri Məleykə Abbaszadə bu gün keçirdiyi mətbuat konfransında belə deyib. Onun sözlərinə görə, əsas təhsil bazasından orta ixtisas məktəblərinə sənəd qəbulu avqustun 10-da yekunlaşacaq.

Tam (11 illik) orta təhsildən texnikumlara sənəd qəbuluna gəlincə, TQDK sədri deyib ki, bu məktəblərə sənəd qəbulu dünən başlayıb. Onun sözlərinə görə, bu gün saat 11.00-a olan məlumata əsasən, artıq 563 abituriyent əsas təhsil bazasından texnikumlara qəbulda iştirak etmək üçün ərizəsini təsdiqləyib.

Məleykə Abbaszadə deyib ki, 11 illik təhsil bazasından orta ixtisas məktəblərinə qəbul ali məktəblərə keçirilən qəbul imtahanlarının nəticələri əsasında aparılır. Bu imtahanlarda 50 baldan yuxarı nəticə göstərənlər 11 illik bazadan orta ixtisas məktəblərinə daxil olmaq üçün ixtisas seçimi edə bilərlər.

Elxan SALAHOV
# 900

Oxşar yazılar