Bakı-sərnişin stansiyası birbaşa və geriyə bilet satışına başlandı

Avqustun 5-dən etibarən Bakı-sərnişin stansiyası, Gəncə vağzalı və respublikanın Qərb zonasındakı xətti stansiyalarda fəaliyyət göstərən bütün bilet kassalarında bilet satışı Mərkəzi Məlumat Bazasından istifadə etməklə tətbiq olunur. Yeni sistemin tətbiqinin birinci günü Bakı-sərnişin stansiyasından geriyə 44 bilet satışı həyata keçirilib.

“Azərbaycan Dəmir Yolları” Qapalı Səhmdar Cəmiyyətinin Mətbuat Katibliyinin rəisi Nadir Əzməmmədov Lent.az-a bildirib ki, dünəndən başlayaraq Qərb zonasında kompüter quraşdırılmış xətti stansiya və bilet kassalarına satış üçün ayrılmış yerlər ləğv olunaraq Mərkəzi Məlumat Bazasına daxil edilib. Mərkəzi Məlumat Bazasının yaradılması ilə əlaqədar xətti stansiyalar üçün ayrılmış bron yerlər ləğv olunub.

Nadir Əzməmmədov bildirib ki, son illər ərzində “Azərbaycan Dəmir Yolları”nın Sərnişin Daşımaları Departamenti tərəfindən sərnişinlərə göstərilən xidmət mədəniyyətinin səviyyəsinin yüksəldilməsi istiqamətində mühüm tədbirlər görülür. Bu tədbirlərdən biri də bilet kassalarında avtomatlaşdırılmış bilet satışı sisteminin tətbiq edilməsidir. Onun sözlərinə görə, bilet satışı texnologiyasının kompüterləşdirilməsi və AİS “Ekspress-AZ” sisteminin genişləndirilməsi proqramına uyğun olaraq, Səhmdar Cəmiyyətin sədrinin müvafiq əmri ilə respublikanın Qərb zonasındakı xətti stansiyalarda fəaliyyət göstərən bütün bilet kassalarında beynəlxalq İnternet şəbəkəsinə qoşulmuş kompüter proqramı tətbiq olunub. Bu proqramın tətbiqi ilə Qərb bölgəsi üzrə hər bir kassa üçün əvvəlcədən ayrılmış yerlərin qabaqcadan birbaşa və geriyə satışına, boş yerlərin Birləşmiş Yol Bürosu vasitəsilə sonrakı stansiyalara ötürülməsinə, sərnişin sıxlığına operativ nəzarət olunur.

Elxan SALAHOV