QHT-lərə Dövlət Dəstəyi Şurasında türkiyəli qonaqlarla görüş olub

İyulun 23-də Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay QuliyevBakıda səfərdə olan Türkiyə Qəzetçilər Federasiyasının (TGF) nümayəndə heyətilə görüşüb.

Nümayəndə heyətinə Türkiyə Qəzetçilər Federasiyasının sədri Atilla Sertel, NTV-nin buro rəhbəri, TGF-nin baş katibi Merih Ak, Sakarya Qəzetçilər Cəmiyyətinin sədri Matur Sefai və Kayseri Qəzetçilər Cəmiyyətinin sədri Vəli Altınkaya daxildir.

Şuranın ofisində keçən görüşdə ikitərəfli əməkdaşlıq əlaqələrinin daha da genişləndirilməsi, antiazərbaycan və antitürkiyə mahiyyətli erməni təbliğatının dünyaya yaydığı yalan və böhtanlara qarşı birgə maarifləndirici təşviqat tədbirlərin həyata keçirilməsi məsələləri müzakirə edilib.

Bu ilin aprel ayında Türkiyə Qəzetçilər Federasiyasının və Şuranın təşkilatçılığı ilə İzmir şəhərində keçirilmiş sərginin Azərbaycan həqiqətlərinin dünyaya tanıdılması baxımından əhəmiyyətli olduğunu vurğulayan A.Quliyev belə tədbirlərin davam etdirilməsini və Avropaya da çıxarılmasını vacib saydığını deyib.

TGF sədri Atilla Sertel ötən müddət ərzində sərginin Türkiyə şəhərlərində davam etdirildiyini və əlavə fotomateriallarla zənginləşdirildiyini bildirib.

Görüşdə Azərbaycan-Türkiyə qardaşlığının daha da möhkəmləndirilməsi və bu yöndə davam edən media-QHT əməkdaşlığının perspektivləri haqda geniş fikir mübadiləsi aparılıb.

Görüşdə Şura təmsilçiləri Fərasət Qurbanov və Səfər Alışarlı, həmçinin Parlament Jurnalistləri Birliyinin sədri Elşad Eyvazlı iştirak ediblər.