Sabah son imtahandır

Sabah II ixtisas qrupu üzrə ali və orta ixtisas məktəblərinə sənəd vermiş abituriyentlər üçün imtahan keçiriləcək. Bununla da 2010/2011-ci tədris ili üçün ali məktəblərə qəbul kampaniyası başa çatacaq.

Tələbə Qəbulu üzrə Dövlət Komissiyasının mətbuat xidmətindən Lent.az-a bildiriblər ki, qəbul imtahanları Bakı şəhərində 46, Naxçıvan şəhərində 2 binada aparılacaq. 2010-cu ildə II qrup üzrə 28072 abituriyent ərizə təqdim edib. Bakı şəhərində 26814, Naxçıvan şəhərində 1258 abituriyent imtahan verəcək. İmtahan bütün binalarda eyni vaxtda – saat 11:00-da başlanacaq və 3 saat çəkəcək.

Komissiyada bildirirlər ki, abituriyentlər iyulun 18-dən etibarən TQDK-nın internet saytına daxil olaraq “İmtahana buraxılış vərəqəsi”ni çap edib götürürlər. Abituriyentlərə imtahan binalarının yerini müəyyən etməkdə kömək məqsədilə Komissiyanın internet saytında xüsusi xəritə-göstəricilərlə təchiz olunmuş, binaların ünvanlarının əks olunduğu proqram yerləşdirilib.

Elxan SALAHOV