“Yoloçka”, “Eskimo”, “Okean”, “Beliy parus”, “Flaminqos”, “Şirvanşahlar” dondurmaları da zay çıxdı

1,1 ton dondurmanın məhv edilməsi barədə sahibkara icrası məcburi göstəriş verilib

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Abşeron rayonu, Xırdalan şəhərində Müzəffər Poladova məxsus dondurma istehsalı sahəsində aparılan yoxlama zamanı “Yoloçka”, “Eskimo”, “Okean”, “Beliy parus”, “Flaminqos”, “Şirvanşahlar” adlı və südlü dondurmaların üzərində saxlama müddətinin normativ sənədlərlə müəyyən edilmiş müddətdən artıq göstərildiyi aşkar edilib.

Lent.az-ın İqtisadi İnkişaf Nazirliyinin rəsmi saytına istinadən verdiyi məlumata görə, bununla əlaqədar istehsal sahəsinin anbarında olan 1,1 ton hazır məhsulun satışının dayandırılması və ticarət şəbəkəsinə göndərilmiş dondurmaların geri yığılması, habelə üzərində saxlama müddəti normativ sənədlərlə müəyyən edilmiş müddətdən artıq göstərilmiş 1 tondan çox bükmə materialından istifadənin dayandırılması barədə sahibkar Müzəffər Poladova icrası məcburi göstəriş verilib.

Eyni zamanda, istehsal sahəsinin anbarında olan hazır məhsullardan nümunələr götürülərək laborator müayinəyə göndərilib. Müayinələr nəticəsində “Flaminqos” adlı dondurmalarda mezofil-aerob və fakültativ-anaerob mikroorqanizmlərin sayının normadan çox, “Yoloçka”, “Eskimo”, “Okean”, “Beliy parus” adlı dondurmalarda isə mezofil-aerob, fakültativ-anaerob mikroorqanizmlərin sayının normadan çox və tərkibində bağırsaq çöpləri qrupundan olan bakteriyaların (koliformalar) olduğu aşkarlanıb.

Bundan başqa, “Flaminqos”, “Beliy parus” adlı və südlü dondurmalarda turşuluq, “Yoloçka”, “Eskimo” və “Şirvanşahlar” adlı dondurmalarda isə yağın kütlə payı və turşuluq normadan az olub.

Bununla əlaqədar olaraq, keyfiyyət və təhlükəsizlik göstəriciləri normativ sənədlərin tələblərinə uyğun olmayan 1,1 ton dondurmanın məhv edilməsi barədə Dövlət Xidməti tərəfindən sahibkar Müzəffər Poladova icrası məcburi göstəriş verilib. Antiinhisar Siyasəti və İstehlakçıların Hüquqlarının Müdafiəsi Dövlət Xidməti istehlakçılara dondurma alarkən diqqətli olmağı tövsiyə edir.