İstanbulda qondarma soyqırım qurbanları “anılacaq”

Bir qrup “ziyalı” aprelin 24-də aksiya keçirəcək
Türkiyədə 24 aprel – qondarma “erməni soyqırımı” münasibətilə anma mərasimləri keçiriləcək. Lent.az-ın “habertürk”ə istinadən verdiyi məlumata görə, ziyalı olduğu iddia edilən bir qrup türk “Taksim” meydanında “Dur de” adlı anma mərasimi təşkil edəcək. Tədbirin aprelin 24-ü saat 19.00-da keçiriləcəyi bildirilir.

Aksiyaya çağırışla bağlı “buacihepimizin.com” saytında imza toplanılır. İmza atanlar arasında Türkiyənin baş naziri Rəcəb Tayyib Ərdoğanın və Tələt Paşanın adları göstərilib. Ərdoğanın peşəsi olaraq “diktator”, Tələt Paşanın peşəsi olaraq isə “tehcirçi” (deportasiyaya məruz qoyan) göstərilib.

Bundan başqa, İnsan Haqları Dərnəyi (İHD) adlı təşkilat da anma mərasimi keçirəcəyi barədə açıqlama yayıb. Həmin qurum tədbirin aprelin 24-ü saat 13.30-da keçirməyi planlaşdırdığını açıqlayıb. İHD iddia edir ki, 1915-ci ildə 220 nəfər erməni ziyalısı tutularaq, İstanbuldakı Haydarpaşa vağzalında qatarlara mindirilərək Anadoluya aparılıb. İddiaya görə, həmin ermənilər öldürülüb, onlardan yalnız bəziləri sağ qalıb. İHD anma mərasimini Haydarpaşa stansiyasında keçirəcəyini açıqlayıb.

Yeri gəlmişkən, erməni mətbuatı Türkiyədəki anma mərasimlərinə geniş yer verib. Erməni jurnalistlər bu xəbərləri “Türk ziyalıları “soyqırım bizim dərdimiz” deyir”, “Türk ziyalıları Türkiyəni soyqırımı anmağa çağırır” və s. bu kimi başlıqlarla təqdim edib.