Daha 28 dini icmaya şəhadətnamə təqdim edildi

Onların arasında Alban-Udin Xristian Dini İcması, Quba rayonu Qırmız Qəsəbə Dağ Yəhudiləri Dini İcması da var

Bu gün Dini Qurumlarla İş üzrə Dövlət Komitəsində dövlət qeydiyyatına alınmış dini icmalara qeydiyyat şəhadətnamələri təqdim olunub. Mərasimdə komitənin rəhbər işçiləri ilə yanaşı ölkənin müxtəlif şəhər və rayonlarında fəaliyyət göstərən dini icmaların nümayəndələri iştirak edib.

Lent.az-ın məlumatına görə, təqdimat mərasimində Dini Qurumlarla İş üzrə Dövlət Komitəsinin sədri Hidayət Orucov çıxış edərək ölkədəki dini durum barədə məlumat verib. O qeyd edib ki, “Dini etiqad azadlığı haqqında” qanuna edilən dəyişikliklərdən sonra ölkədə fəaliyyət göstərən bütün dini icmaların yenidən dövlət qeydiyyatına alınması prosesi başlayıb. İndiyədək 150-yə yaxın dini icma yenidən qeydiyyatdan keçib və onlara müvafiq şəhadətnamələr təqdim olunub. Onların arasında Alban-Udin Xristian Dini İcması, Quba rayonu Qırmız Qəsəbə Dağ Yəhudiləri Dini İcması və Səbayel rayonundakı Həzrəti-Məhəmməd Məscidi Dini İcması da var.

Hidayət Orucov bildirib ki, hazırda 300-dən çox dini icmanın sənədlərinə baxılır. Bundan başqa, 100-dən artıq dini icmanın sənədləri baxılmaq üçün Qafqaz Müsəlmanları İdarəsinə təqdim olunub. Onun sözlərinə görə, yaxın aylar ərzində hələ 400-dək dini icmanın sənədlərinə baxılacağı gözlənilir.

Təqdimat mərasimindən sonra qeydiyyat şəhadətnaməsi alan dini qurumların rəhbərləri çıxış edərək komitə sədrinə və ölkə rəhbərliyinə onlara yaradılan şəraitə görə minnətdarlıqlarını bildiriblər.

Elxan SALAHOV