“Tunisdə azərbaycanlı turist və ya iş adamı yoxdur”

Azərbaycan Respublikasının Mərakeş Krallığındakı səfirliyi hazırda Tunis ərazisində turizm, yaxud digər məqsədlər ilə vətəndaşlarımızın olub-olmadığının müəyyənləşdirmək üçün Tunisin Rabatdakı səfiri Sadiq Qurbi ilə görüş keçirib.

Xarici İşlər Nazirliyinin mətbuat xidmətindən Lent.az-a verilən məlumata görə, Azərbaycan vətəndaşlarının hazırda Tunisdə olub-olmaması və onların aşkar ediləcəyi təqdirdə müvafiq köməkliyin göstərilməsinə dair nota Tunis Xarici İşlər Nazirliyinə çatdırılması üçün səfir Sadiq Qurbiyə təqdim edilib.

Xarici İşlər Nazirliyi onu da bildirir ki, Tunisdəki nümayəndəliyimiz də müvafiq tədbirlər həyata keçirərək Tunisdə turist, yaxud da iş adamı qismində vətəndaşlarımızın olmadığını dəqiqləşdirib. Nümayəndəlik Tunisdə daimi yaşayan Azərbaycan vətəndaşları və onların ailə üzvlərinin məlum hadisələr zamanı xəsarət almadığını, onların Tunisdə vəziyyətlərinin sabit olduğunu və Azərbaycana qayıtmağa ehtiyac duymadıqlarını müəyyənləşdirib.