DBX-də 20 Yanvar şəhidləri anılıb

DBX-nin mətbuat xidmətinin rəhbəri Yolu Xanvəli Lent.az-a bildirib ki, tədbir şəhidlərin əziz xatirəsinin bir dəqiqəlik sükutla yad edilməsi ilə başlayıb. Daha sonra DBX-nin rəisi Sialə Rüstəmova çıxış edərək 20 Yanvar faciəsini xalqımızın tarixinə qanla yazılmış səhifələrdən biri kimi dəyərləndirib.

“20 Yanvar tariximizə təkcə faciə kimi yox, həm də Azərbaycan xalqının mübarizlik, dönməzlik, çağdaş milli-azadlıq hərəkatının qəhrəmanlıq günü kimi daxil oldu. Həmin gün yüzlərlə qəhrəman oğul və qızlarımız təpədən-dırnağa qədər silahlanmış 35 min nəfərdən ibarət sovet ordusunun qarşısına əliyalın çıxmağa qadir olduğunu dünyaya sübut edib” - deyə, DBX-nin rəisi qeyd edib.

Tədbirdə bildirilib ki, 1990-cı il yanvarın 20-nə keçən gecə SSRİ konstitusiyasının 119-cu və Azərbaycan SSR konstitusiyasının 71-ci maddələrini kobud şəkildə pozan Sovet imperiyası respublikamıza qarşı açıq təcavüzə başlayıb, sovet ordusunun xüsusi təyinatlı dəstələri, daxili qoşunların böyük bir kontingenti, SSRİ DTK-nın “Alfa” Qrupu, həmçinin Stavropol, Krasnodar və Rostovdan səfərbərliyə alınan erməni əsgər və zabitləri, sovet hərbi hissələrində xidmət edən ermənilər Bakıya soxularaq, misli görünməmiş qəddarlıqla bir gecənin içində 131 nəfəri qətlə yetirmiş, 744 nəfəri yaralayıb.