Azərbaycan prezidentinə “Jurnalistlərin dostu” mükafatı təqdim olunub

APA-nın xəbərinə görə, mərasimə prezident İlham Əliyevlə yanaşı, xanımı Mehriban Əliyeva, həmçinin dövlət və hökumət nümayəndələri, ictimaiyyət təmsilçiləri qatılıblar.

Mükafatı Azərbaycan prezidentinə Mətbuat Şurasının sədri Əflatun Amaşov təqdim edib. Tədbirdə çıxış edən prezident İlham Əliyev bildirib ki, jurnalistlərin dostu olmaq onun üçün şərəfdir: “Jurnalistlərin çətin və ağır fəaliyyətini, Mətbuat Şurasının fəaliyyətini müsbət qiymətləndirirəm. Jurnalistlərin məişət, mənzil problemi var. Bu il mənzil tikintisi ilə bağlı imzaladığım sərəncam jurnalistlərin sosial vəziyyətinin yaxşılaşdırılması istiqamətində ilk addımdır. Bu addımın davamı da olacaq. Mənzillərin bölüşdürülməsində ədalət prinsipi qorunmalı, ayrı-seçkiliyə yol verilməməlidir. Azərbaycan jurnalistikasının inkişafı üçün əlimdən gələni edəcəyəm”.

Prezident qeyd edib ki, artıq Azərbaycanda müstəqil mətbuat var və bu sahədə əsaslı dönüş 1998-ci ildə Heydər Əliyev tərəfindən senzuranın ləğvi ilə baş verib: “Mən ədalətli tənqidin tərəfdarıyam. Böhtan və təhqir halları yolverilməzdir. Sevindirici haldır ki, belə hallar getdikcə azalır”.

Sonda Azərbaycan prezidenti yanında KİV-in İnkişafına Dövlət Dəstəyi Fondunun elan etdiyi yazı müsabiqəsinin qalibləri mükafatlandırılıb. Mükafatları jurnalistlərə Prezident Administrasiyasının rəhbəri Ramiz Mehdiyev təqdim edib. Həmçinin bir qrup media rəhbərinə “Azercell” şirkəti tərəfindən hədiyyələr təqdim olunub.

Qeyd edək ki, dekabrın 1-dən 20-nə kimi “RUH” Azərbaycan Jurnalistləri Müdafiə Komitəsi 2010-cu ildə “Jurnalistlərin dostu” mükafatı qalibinin müəyyənləşdirilməsi ilə bağlı kütləvi informasiya vasitələri və jurnalist təşkilatları arasında sorğu keçirib.
Sorğuda 30 gündəlik, 19 həftəlik qəzet, 2 jurnal, 11 informasiya agentliyi, 13 jurnalist təşkilatı, 8 informasiya portalı, 7 televiziya və 3 radio kanalı, ümumilikdə 93 KİV iştirak edib. Mükafatın əsasnaməsinə uyğun olaraq gündəlik qəzetlərə, televiziya kanallarına və informasiya agentliklərinə 2, digər KİV-ə və jurnalist təşkilatlarına 1 anket vərəqi təqdim olunub. Respondentlərdən “2010-cu ilin yekunlarına görə hansı ictimai-siyasi xadimi, vəzifəli şəxsi jurnalistlərin dostu hesab edirsiniz?” sualını cavablandırmaq xahiş olunub.
Sorğuda iştirak edənlərin 81 faizi Azərbaycan prezidenti İlham Əliyevi “Jurnalistlərin dostu” mükafatına ən layiqli namizəd hesab ediblər.

Mükafatın əsasnaməsinə görə, KİV-in inkişaf etdirilməsi sahəsində müstəsna xidmətləri olan şəxslər mükafatın laureatı ola bilərlər.

“RUH” AJMK-nın “Jurnalistlərin dostu” mükafatının təsis edilməsində əsas məqsəd cəmiyyətdə söz və məlumat azadlığı prinsiplərini inkişaf etdirmək, media ilə dövlət orqanları, özəl qurumlar, ictimai birliklər və siyasi partiyalar arasında əlaqələrin möhkəmlənməsinə köməklik göstərmək, KİV-ə qayğı ənənələrini stimullaşdırmaqdır.

1997-ci ildə təsis edilən mükafat sonuncu dəfə 2002-ci ildə Heydər Əliyevə təqdim olunub.