Qırmızı ləkəli yumurtalar zəhərlidir?

Yumurta kənardan baxdıqda heç bir problemi olmayan kimi görünsə də, qırdığınız zaman fərqli bir görünüşlə qarşılaşa bilərsiniz. İnsanlar sevərək yediyi yumurtaların sarısında bəzən qırmızı ləkələrə rast gəlirlər. Bir çox insan bu ləkələrin zəhərli olub-olmamasından narahatdır.

Lent.az xarici mətbuata istinadən xəbər verir ki, hər yumurtada olmasa da, bəzi yumurtaları qırdıqdan sonra üzərində qırmızı ləkələr görə bilərsiniz.

Yumurta sarısının üzərindəki qırmızı ləkələrə qan ləkələri deyilir. Yumurta sarısının içərisində əmələ gələn qan damcıları toyuqlar yumurtlayanda özbaşına əmələ gəlir. Nəticədə yaranan qan ləkələri toyuq yumurtalıqlarında qan damarlarının qopması nəticəsində yaranır.

Yumurtada qırmızı deyil, qəhvəyi ləkələr görürsünüzsə, bu, "ət ləkəsi" adlanan başqa bir ləkə növüdür. Qırmızı qan ləkələrindən başqa yumurta ağında qəhvəyi və ya ağ ləkələr görünə bilər. Yumurta sarısında qan ləkəsi çox nadir bir haldır. Eynilə, qəhvəyi ləkələrin görülmə tezliyi də çox azdır. ABŞ Kənd Təsərrüfatı Departamenti uyğun şərtlərdə bişirilmələri şərti ilə ləkələnmiş yumurtaların sağlamlıq üçün heç bir təhlükə yaratmadığını vurğulayır.

Lakin çiy və ya az bişmiş yumurtanın tərkibində Salmonella adlı bir növ patogen bakteriya ola bilər ki, bu da qida zəhərlənməsinə səbəb ola bilər. Bu səbəblə yumurta çiy və ya az bişmiş halda istehlak edilməməlidir. Eyni zamanda, bişirmə prosesi yumurtanın tərkibindəki zülal və biotinin həzmini asanlaşdırır. Yumurtanın yüksək temperaturda uzun müddət bişirilməsi isə A vitamini, D vitamini və antioksidantların itirilməsinə səbəb olur. Bununla belə, yumurtalar yüksək temperaturda bişirildikdə, onların tərkibindəki xolesterin oksidləşə və oksisterol kimi tanınan birləşmələr əmələ gətirə bilər.

Qandakı oksidləşmiş xolesterol və oksisterollar ürək xəstəliyi riskinin artması ilə əlaqələndirilir.