İdman mərclərinin psixologiyaya TƏSİRİ

Onlayn platformalarda mobil idman mərcləri daha riskli qumar davranışına və qumar asılılığına səbəb olur. Kvinslenddəki Avstraliya Dövlət Universitetinin alimləri bu qənaətə gəliblər. Nəticələr Journal of Behavioral Addictions (JBA) jurnalında dərc olunub.

Lent.az xarici mediaya istinadla bildirir ki, smartfon mərclərinin mürəkkəb dinamikasını və onun potensial zərərini öyrənmək üçün tədqiqatçılar ekoloji anlıq qiymətləndirmə metodundan istifadə ediblər. Bu, real vaxt rejimində məlumat toplamaqdan ibarətdir. Alimlər birbaşa iştirakçılardan 1378 mərc seansı haqqında məlumat əldə edə biliblər.

İştirakçılar həftədə ən azı iki dəfə idmana və ya espora mərc edən 18-29 yaş arası gənclər olublar. Tədqiqatçılar iştirakçıların psixi sağlamlığı, tez-tez istifadə olunan mərc platformaları və qumarla bağlı mənfi təcrübələri haqqında məlumat toplayıblar.

Nəticələr göstərib ki, məxfiliyi qoruyaraq istənilən vaxt istənilən yerdən mərc etmək imkanı asılılığın inkişafının əhəmiyyətli göstəricisi olub. Smartfonlarda mərc oynamağı cəlbedici və rahat edən eyni xüsusiyyətlər daha riskli qumar davranışına səbəb ola bilər.

Bundan əlavə, smartfon mərcləri sonradan oxşar məqsədlər üçün kompüter və ya noutbukdan istifadə etmək ehtimalının yüksək olması ilə əlaqələndirilib.

Alimlər qeyd ediblər ki, bu cür fəaliyyətlərin yüksək əlçatanlığı, cəlbediciliyi və anonimliyi impulsiv davranışın inkişafına və qumar oyununa potensial asılılığın inkişafına səbəb ola bilər. Eyni zamanda, bukmeker klublarının promosyonlarına geniş giriş daha çox sayda operatorla mərclərin qoyulması ilə əlaqələndirilir.