Türk naşirindən Azərbaycana dair məruzə

İstanbuldakı “Post” nəşriyyatının sahibi, müəllim və yazar Hayri Ataş, Türkiyə-Azərbaycan münasibətlərinin bugünkü vəziyyəti, iki ölkə arasındakı təhsil, nəşr və mədəniyyət əlaqələrinin inkişaf yolları barədə məruzə edib. APA-nın Türkiyə müxbirinin məlumatına görə, ”Timaş” nəşriyyatının binasında gerçəkləşdirdiyi məruzəsində Hayri Ataş 2010-2015-ci illər arasında Azərbaycanda işlədiyi müddətdə gördüyü hərarətli münasibətdən danışıb: “Azərbaycanda küçəyə çıxıb istənilən vətəndaşdan Türkiyəni soruşsanız, ən azı 30 dəqiqə danışa bilər. Türkiyədə isə barmaqla sayılacaq dərəcədə az insan Azərbaycan barədə 3-5 cümlə deyə bilir. Azərbaycanda qarşılaşdığınız fərdi hadisələri cəmiyyətin hamısına şamil etmək doğru deyil. Təhsil sahəsində əlaqələrimizin gücləndirilməsi işində çox geridə qalmışıq, Türk dövlətinin bu işə sistematik şəkildə dəstək verməsi lazımdır. Mədəniyyət sahəsində Azərbaycan nəinki Şərqin, dünyanın ən öndə gələn ölkələrindən biridir, Türkiyə o xəzinədən lazımi şəkildə istifadə etməlidir”, deyə yazar-müəllim-naşir Hayri Ataş vurğulayıb.

Məruzənin sonunda Hayri Ataş, Türkiyənin tanınmış şairi Yavuz Bülənt Bakilərin və Azərbaycan ədəbiyyatının tərcüməçisi və tədqiqatçısı Yusif Gədiklinin suallarını cavablandırıb.