Rəssam Teymur Rüstəmovun “…Dünən, bu gün, sabah...” adlı fərdi sərgisi olub

Lent.az-ın məlumatına görə, sərgidə müəllifin 25 işi nümayiş etdirilib.

Sərgidə 2009-cu ildə Azərbaycan ekspozisiyasının bir hissəsi kimi, məşhur Venesiya biennalesində nümayiş etdirilən multimediya instalyasiyası “I TRUST”, “Narkotiklərə yox” mövzusundakı heykəltəraşlıq kompozisiyaları təqdim olunub. Başqa işləri ilə bərabər heykəltəraş tamaşaçılara iştirak etməyi və “Arzular ağacı” adlı interaktiv işində “arzu tutmağı” təklif edib.

Teymur Rüstəmovun işləri təkcə vətəndə deyil, həm də xaricdə - Rusiya, Gürcüstan, Polşa, Almaniya və eləcə də İtaliyada – 53-cü Venesiya biennalesində nümayiş etdirilib.

Teymur Rüstəmov Azərbaycanın populyar müasir rəssamlarından biri, Əzim Əzimzadə adına Rəssamlıq Məktəbi və Tbilisi Dövlət Rəssamlıq Akademiyasının məzunu, Azərbaycan Rəssamlar İttifaqının üzvüdür. Teymur Rüstəmov əsasən heykəltəraş kimi tanınır. Lakin o, yalnız heykəltəraşlıqla məşğul olmur. Onun işləri arasında videoart da, dekorativ kompozisiyalar da, instalyasiyalar da vardır.

Teymur Rüstəmov Azərbaycanın tanınmış rəssamları olan Rüstəmovlar xanədanının üzvüdür. O, atası Aslan Rüstəmov və qardaşı Mahmud Rüstəmovla birlikdə Bakıda monumental heykəltəraşlıqla bağlı bir sıra layihələrin həyata keçirilməsində iştirak edib. Bunlar Xocalı faciəsinə həsr edilmiş abidə, Ukrayna dairəsi yaxınlığındakı H. Əliyev parkında Heydər Əliyevin abidəsi və digər layihələrdir.

Sərgi 31 dekabra qədər davam edəcək.

Lalə Yusifqızı