Manana: “Onlar mənim susmağımdan istifadə edirlər”

Pirat disk “alverçiləri”ndən bezən müğənnilərin sırasına əməkdar artist Manana da qoşulub.

“Estrada” adlı albomunu musiqisevərlərdən öncə piratlar dinləyən və internet saytlarında yayanlar Manananın qəzəbinə tuş gəlib.

Gürcü qızı Manana Lent.az-a bu barədə maraqlı açıqlama verib: “Hamı soruşur ki, niyə diskimi internet vasitəsi ilə pərəstişkarlarıma təqdim edirəm. İnanın, bu diskdən xəbərim yoxdur. İlk dəfədir ki, piratların hədəfinə tuş gəlmişəm. Bəzi “işbazlar” həmişə radio dalğalarında, müxtəlif teleproqramlarda səslənən mahnılarımı yığma disklərdə satışa çıxardılar. Görünür, artıq onlar mənim susmağımdan istifadə edib, özbaşına fəaliyyətlərini daha geniş müstəvidə həyata keçirirlər”.

Manana da piratlara qarşı mübarizəyə başlayıb: “Söz verirəm ki, məsələ araşdırılacaq və piratlar öz layiqli cavablarını alacaqlar”.

Leyla