Arda Turan məşhur teleaparıcı ilə yaxalandı

Son zamanlar Türkiyə milli komandasının və “Qalatasaray” klubunun futbolçusu Arda Turanın adı aparıcı və aktrisa Sinem Koballa yanaşı hallanmağa başlayıb. Lent.az-ın “Sabah” qəzetinə istinadən verdiyi məlumata görə, Arda avqustun 12-də “ay-ulduzlular”ın Ukrayna yığmasını 3:0 hesabı ilə məğlub etdiyi yoldaşlıq görüşünün ertəsi günü səhər saatlarında Sinemlə birgə yaxalanıb.

“Qalatasaray” yerli vaxtla gecə saat 3:30 radələrində Kiyevdən İstanbula qayıdıb. Bundan cəmi 6 saat sonra 22 yaşlı yarımmüdafiəçi Bağdad prospektindəki “Saray” restoranında tanınmış aktrisa ilə qəhvəaltı edib.

Qeyd edək ki, Arda Turanın Sinem Koballa münasibətləri haqda əvvəllər də xəbərlər dolaşırdı. Lakin hər dəfə Arda Sinemlə aralarında duyğusal baxımdan heç bir şeyin olmadığını, yalnız dost münasibətləri saxladığını bildirib.