İt ona gülümsəyən insana baxanda nə "düşünür" - cavabı tapıldı

İtlərlə insanların uzun illər birgə yaşaması onların insan emosiyalarını kifayət qədər yaxşı ayırd etməsinə səbəb olub.

Lent.az-ın xarici mediaya istinadən xəbərinə görə, it sahibləri tez-tez deyirlər ki, ev heyvanları onların hisslərini başa düşür.

Vyana Universitetində aparılan yeni araşdırma bu fikrin doğru ola biləcəyini göstərib. Alimlər insan üzündəki müxtəlif emosiyalara itlərin necə reaksiya verdiyini öyrənmək üçün onların beyin fəaliyyətini MRT vasitəsilə müşahidə ediblər.

Araşdırmanın nəticələrinə görə, itlər xoşbəxt üz ifadələrini kədərli, qəzəbli və qorxmuş üzlərdən fərqli şəkildə qəbul edir. Tədqiqatçılar hesab edirlər ki, bu nəticələr itlərin niyə insan üçün bu qədər etibarlı və yaxın yoldaşa çevrildiyini daha yaxşı izah etməyə imkan verir.

Tədqiqatda xüsusi təlim keçmiş ev itləri iştirak edib. Onlara MRT aparatının içində hərəkətsiz qalmaq öyrədilib və daha sonra müxtəlif emosiyalar ifadə edən insan üzlərinin fotoları göstərilib.

İtlər gülümsəyən üzlərə baxarkən onların beynində daha yüksək düşüncə prosesləri və mükafat sistemi ilə əlaqəli sahələrin fəallığı artıb. Alimlərin fikrincə, bu, insan təbəssümünün itlər üçün xüsusi məna daşıdığını göstərir. Yəni gülümsəyən üz onlar tərəfindən tərif, mükafat və ya başqa müsbət təcrübə kimi qəbul oluna bilər.

Tədqiqatçılar itlərin emosiyaları sadəcə “yaxşı” və “pis” kimi ayırıb-ayırmadığını da müəyyənləşdirmək istəyiblər. Kompüter analizi nəticəsində məlum olub ki, itlər qorxu, qəzəb və kədər kimi müxtəlif mənfi emosiyaları da bir-birindən fərqləndirə bilir.

Başqa sözlə, itin beyni yalnız insanın xoşbəxt və ya kədərli olduğunu müəyyən etmir, eyni zamanda müxtəlif emosional vəziyyətlər arasında daha incə fərqləri də seçə bilir.

Alimlərin sözlərinə görə, bu qabiliyyət minilliklər ərzində insanlarla yanaşı yaşayan itlərdə tədricən formalaşa bilər. İtlər insanları anlamaq üçün təkcə üz ifadələrinə deyil, həm də bədən dilinə, səs tonuna və qoxuya diqqət yetirirlər. Yeni araşdırma isə üz ifadələrinin də bu prosesdə mühüm rol oynadığını göstərir.

İtlərin insan nitqini necə tanıdığı da alimlərin diqqət mərkəzindədir. Son tədqiqatlardan birində müəyyən olunub ki, itlərin beyni insan nitqindəki səsləri müəyyən ardıcıllıqlara ayıra bilir. Onlar bəzi səslərin təkrarlanan nümunələrini tanıyaraq yaxın insanların səsinə və danışıq tərzinə uyğunlaşa bilirlər.

Heyvanlar itlər