Sevinc Vaqifqızı ilə "Ana xəbər" bloku – 23 May

GÜNÜN ŞƏRHİ

Yaxın Şərqdə maraqlar mübarizəsi aparan tərəflər dəyişməsə də, gərginlik mərkəzi dəyişir. Uzun illər Fələstində bir-birinə güc nümayiş etdirən dövlətlər, sonra bu mübarizəni Əfqanıstana, İraqa və Suriyaya daşıdılar. İndi isə mübarizə müstəvisi və formaları dəyişib, regional güclər münaqişə zonasında rəqibə tərəfdaş hərbi-siyasi qruplaşmalar vasitəsilə təzyiq göstərmir, bir-birinə açıq meydan oxuyurlar. Buna səbəb bölgədə gedən proseslərdə məzhəb faktorunun daha qabarıq üzə çıxması, yaxud çıxarılmasıdır. Ən təhlükəli məqam da budur - Yaxın Şərqdə sünni-şiə davası başlayarsa, uzun illər qan dizə çıxacaq. İran və Səudiyyə Ərəbistanı necə təhlükəli oyuna başladıqlarının mahiyyətinə varmır, proseslərin ildırım sürətilə bütün regionu, islam dünyasını bürüyəcəyini anlamır. Ya da anlamaq istəmir, daha doğrusu, anlamağa qoymurlar...