İlansancma faktlarının sayı artıb

"Son 1 həftə ərzində respublikada 6 nəfər ilan vurma faktı ilə Kliniki Tibbi Mərkəzin toksikologiya şöbəsinə müraciət edib. Müraciət edənlər əksəriyyəti Aran bölgəsindəndir". Bunu APA TV-yə Kliniki Tibbi Mərkəzin toksikologiya şöbəsinin müdiri Azər Maqsudov deyib. Onun sözlərinə görə, ilan vurması nəticəsində zəhərlənmələrin sayı may ayı ərzində 21 nəfərə çatıb. "Bu, ötən ilin müvafiq göstəricisindən bir qədər artıqdır. Bu il ərzində ilan vurmasından zərərçəkənlərin vəziyyəti orta ağır və ağır qiymətləndirilib. Zəhərlənənlər vaxtında həkimə müraciət etdiyindən onlar arasında ölüm faktı qeydə alınmayıb". Azər Maqsudov deyib ki, zəhərlənənlər əsasən, 20-25, 40-45 yaş arasında olan şəxslərdir. Eyni zamanda 6 nəfər əqrəb, 4 nəfər isə qaraqurd sancmasından zəhərlənərək mərkəzə müraciət edib. Şöbə müdiri deyib ki, son həftədə mərkəzə 12 nəfər dərman zəhərlənməsi-alergik reaksiya ilə daxil olub. Vaxtında müraciət edildiyindən müalicədən sonra həmin şəxslər evə buraxılıb. Bakı Şəhər Təcili və Təxirəsalınmaz Tibbi Yardım Stansiyasının baş həkiminin müavini Oqtay Şahmalıyev isə bildirib ki, son həftə ərzində ümumilikdə 10018 çağırış qeydə alınıb. Orta hesabla günə 1600 çağırış deməkdir. Bu çağırışların içərisində 1 günvurma və 11 qida zəhərlənməsi daxil olub.